الخرم الثاني : مسجون في زمن الخرافات

شيء جميل قوي إن الواحد يقول رأييه .. و شيء جميل برضه إن الواحد يعترض على اللي ما يعجبهوش بس حاجة مقرفة و محبطة إن الواحد يتكلم في اللي ما ليهوش فيه و يقول كلام يخلي البلد تروح في ستين داهية

و أنا هنا حناقش الخرم الثاني اللي في بنطلوني و برضه موجود في بنطلون الوطن العربي و النقاش حيكون تحت ثلاث موضوعات اساسية و هي :

السياسة : طبعا الكل بيتكلم في السياسة النهارده يعني حتى ممكن تلاقي شوية شباب فاشل على القهوة بيتناقشوا في الحكم و الدستور و البطيخ ...... طيب نحب نسألهم انتم درستم كام كتاب عن السياسة و الدولة و الحكم قبل ما تعملوا المناقشة العظيمة ديه ... طبعا اخرهم كتب الكلية و لو قروا شوية يبقى جرايد الطعمية اللي بتصدر على الأرصفة و بعدين يفتح صوته و يقول : لازم نحارب !!!

أنا بصراحة قبل ما اتكلم أو اقول رأيي في اي حاجة بحب اتبع مبدأ ( كانت ) في التحليل و هو ضرورة أن تقرأ كل شيء و تدرس جميع النواحي في الموضوع بشكل مستفيض قبل ان تطلق قرارك و حكمك على الموضوع ... يعني مثلا انا قرأت ترجمة كتاب ( السياسة الدولية المعاصرة ) و وجدت إن الحرب هي فشل للسياسة و ليست هي مفتاح السياسة و بناءاً على هذه القاعدة يصبح الرئيس بوش رغم دراسته في جامعة يال و هارفرد ما بيعرفش الألف من كوز الذرة في السياسة

طبعا ده مثال خارجي أما داخلياً فمثلا الشباب اللي كان متحمس قوي و بيقول خلينا نحارب علشان ( لبنان و القدس ) اقول ليهم طب لو انهزمنا زي كل مرة و راحت مننا سيناء و احتمال تروح كمان كل مدن القناة ساعتها نجيب منين ( كامب ديفيد ) جديدة علشان نرجع سيناء .. طبعا ابقوا قابلوني

الدين : ديه بقا مشكل المشاكل ... أنا حتكلم عن نفسي بصفتي مصري .. الشعب المصري طول عمره متفتح و بيقبل المناقشة في الدين و بينادي بالحداثة و التجديد و الإسلام العصري و يكفي الأعلام بتوع الفكر الإسلامي امثال ( محمد عبده و محمد الغزالي و غيرهم .. ) و ده كان سبب التقدم المستمر لعجلة التنوير في مصر و لكن ما اعرفش ايه اللي حصل و نجحت السعودية - رغم حبي ليها - في زرع الفكر الوهابي المتأخر الذي رفضه الشعب المصري منذ بداية نشوء الحركات ( التكفيرية ) في مصر في عهد السادات

و تأخذ هذه الجماعات إسم - ( السلفية ) - كدليل على ان من يكرههم أو يعترض هو مبتدع و لا يسير على مبدأ خير الأمة و سلفها الصالح .. طيب مين قال ليهم إن السلف كانوا لا يجتهدون بعقولهم و انهم كانوا بعتمدوا على النقل فقط و مين قال ان السلف كانوا بيكفروا الناس و يقتلوهم .. لو كان السلف كده ما كنش حد دخل في الإسلام أصلاً ..... و بعدين ما تنسوش إن السعودية هيه اللي اهدرت دم الرئيس الشهيد أنور السادات و هيه اللي احلت دم ذكرى و غيرها من الفنانات و كمان كانت سبب لعنة القتال بين الفلسطينيين بعد ان فشل مؤتمر مكة في حل النزاع و كانت النتيجة ازفت من الأول .. من الأخر الفلوس لا تبني حضارة

العلم : ده بقا نقول عليه المرحوم .... للأسف العلم عندنا - ( عندي أنا في الجامعة بتاعتي ) - عبارة عن كتب الباثولوجي و المايكرو بيولوجي و بس .. يعني مثلا أنا سمعت بوداني امينة المكتبة عندنا في الجامعة بتقول على كتب الفلسفة و علم النفس اتخنقنا من الكتب ديه امتى نخلص منها ؟؟؟؟

و طبعاً بعد نشاط الحركات الدينية التي تنسب نفسها بشكل سافر و كاذب للـسلف اصبح العلم كما قال الإمام الشافعي

العلم قال الله قال رسوله في الدينٍ ... و ما سوى ذلك وساوس الشياطينٍ

يعني كل العلوم سفسطة و تخاريف و بس الدين هوه اللي علم و ده شيء غريب جداً حيث إن الرسول - صلى الله عليه وسلم - بعث الصحابة يتعلموا لغات العدو و حتهم على التداوي و تعلم الطب .. يعني ما قلش ليهم العلم هوه بس الدين

طبعا هناك ملايين الأخرم الأخرى في بنطلوني انتظروها قريبا

مع تحياتي