الشمس حتبقى جهاز تكييف

في البداية أعرفكم على صديق رحلة كفاحي الفنجري و هوه شكلي و زيي بالظبط في كل حاجة و رغم اننا بنختلف في احيان كثيرة و لكننا بنتصالح في الأخر

منذ يومين كنت أنا و الفنجري في البحرين نركب الميكروباص الساعة 12 الظهر و دار بينا الحوار التالي

أنا : أوف !! ايه الحر ده

الفنجري :حر مين يا عم ؟؟ ديه شكلها بروفه لجهنم !!

أنا : جهنم ايه فال الله و لا فالك

الفنجري : يا عم مش قصدي الجو اصله حر نار

أنا : سمعت اغنية علي الحجار اللي بيقول فيها : الشمس حتبقا جهاز تكييف

الفنجري : يا ريت

أنا : تفتكر لو الشمس تحولت إلى جهاز تكييف حنعمل ايه ساعتها ؟

الفنجري : اكيد حنشغل الدفاية

أنا : تصدق الكلام عن التكييف خلاني انسى حرارة الجو

الفنجري : لأ يا فالح الجدع سواق الميكروباص شغل التكييف

أنا : طب ليه ما شغلهوش من الأول

الفنجري : يمكن ما كانش حاسس بالحر

أنا : يا نهار مش زي بعضه الراجل قفل التكييف تاني

الفنجري صرخ بصوت عالي : يا حماااااااار افتح التكييف

بعد دقيقتين من الصمت الحاد توقف الميكروباص و رد السواق : الأخ اللي قال يا حمار يتفضل ينزل لحسن اجيب اجله

أنا : ماتخفش يا فنجري أنا جدع جداً و مش حسيبك

الفنجري : يلا بينا نخلع قبل ما الراجل يشوفنا

أنا : لأ لأ إحنا لازم نتخانق الجو حر و هوه قافل التكييف

الفنجري : خلاص الشورة شورتك و الراي رأييك

أنا و الفنجري ذهبنا إلى سائق الميكروباص و كانت المفاجأة ( راجل طوله مترين و عرضه متر حوالي خمسميت عضلة فانتوم في جسمه ) يعني راجل مدرع

الفنجري : انت عايزنا نتخانق مع الدبابة ديه

أنا : قصدك تتخانق لوحدك أنا ما شتمتش حد أنت اللي قلت له يا حمااااار

الفنجري : اخص عليك كده تخلع بعد ما تورطني

أنا : العمر غالي برضه يا اخويا يا فنجري

الفنجري : اخوك مين و بتاع ايه يخرب بيتك أنا حبقى المرحوم فنجري بعد الخناقة ديه

أنا : طيب سلام عليكم بقا أنا حنزل هنا ابقا اتصل بيا بعد الخناقة

السواق : مين فيكم اللي قال يا حماااااااااااااار

أنا : الفنجري ... الفنجري .... و الله العظيم الفنجري

الفنجري : لأ لأ .. انت فهمت غلط يا فندم أنا ما قلتش يا حمار لحضرتك أنا قلت يا حمار للواد العبيط ده علشان قفل التكييف

السواق : بقا انت اللي بتقفل التكييف بقا كل ما افتحه

أنا : لا يا عم أنا ما قفلتش حاجة

السواق : يعني اموت من الحر و لا من الغباوة اللي في ام الأشكال اللي زييكم

الفنجري : الشمس حتبقا جهاز تكييف يا عمو

السواق : انت عبيط ياض ... شمس ايه اللي تبقى جهاز تكييف

أنا : طيب ممكن ننزل هنا يا اوسطى

السواق : غوروا في ستين داهية الله يقرفكم مليتم البلد

أنا و الفنجري بعد ما نزلنا من الميكروباص صرخنا بصوت عالي : يا حمااااااااااااااااار افتح التكييف

و طبعا جرينا بسرعة قبل ما السواق يلحق يمسكنا

و هكذا اصبحت الشمس كما قال علي الحجار جهاز تكييف

!!! هموم إسراطينية

بعد أن قام العرب ببيع جميع القضايا بسعر الجملة في سوق ( اللي ما يشتري نعمل له تخفيض علشان يشتري ) ..قام الجنرال ( أبو القذائف ) بإنشاء الدولة الإشتراكية الراسمالية الأفرواوروبيوافريقية الكبرى و اصدر قراره بإنشاء دولة ( إسراطين ) بدلاً من اسرائيل و فلسطين

و بعد مرور عشرين عاماً على هذا الحدث التاريخي جلس احد المواطنيين الاسراطينيين في احدى المقاهي الاسراطينية و هو يستمع إلى

الأخبار و يعلق عليها ( طبعاً باللغة العربوعبروية ) و قد قمت بترجمتها لكم بالعربية

عبد السلام : سمعت يا ( يوشع ) الخبر ده ؟؟

يوشع : خبر ايه يا ( عبدو ) ؟

عبد السلام : ( شاب اسراطيني يبحث عن عمل ) ؟؟

يوشع : ياما بكره نشوف بدال دخل فيها العرب ابقى قابلني لو فلحنا

عبد السلام : و مالهم العرب يعني ؟ انت كل حاجة تحشر فيها العرب علشان تشتم و خلاص

يوشع : لأ مش قصدي إن العرب هم سبب مشكلة الشاب ده .. أنا قصدي إن الشاب ده اكيد عربي ما دام بيبحث عن عمل

عبد السلام : إزاي يعني !!! ممكن تفهمني

يوشع : اصله دفع كل اللي في جيبه على اعلانات البحث عن عمل شكله فاكر إن الاعمال بالاعلانات

عبد السلام : و الله معاك حق على أيامي كانت الأعمال بالنيات

يوشع : نيات ايه يا حبيبي .. الأعمال دلوقتي بتتعمل بالاحجبة و ببودرة العفريت

عبد السلام : طب خد عندك الخبر ده ... ( اسراطينييون يتظاهرون من أجل تحرير العراق ) ؟؟

يوشع : هههههههههههههههههههههه

عبد السلام : ؟؟؟؟؟؟؟؟

يوشع : دول برضه من الجماعة العرب اللي قلتلك عليهم

عبد السلام : ؟؟؟؟؟؟؟؟

يوشع : اصلهم فاكرين الامريكان عبط و حيسيبوها ليهم

عبد السلام : بس الامريكان قالوا انهم جم علشان يحرروا العراق مش يحتلوه

يوشع : أه فعلاً حرروا العراق من ايدي العراقيين

عبد السلام : قصدك احتلوا العراق

يوشع : لا ابداً هما بس بيعملوا اعمال التشطيب هناك و حيسلموا البلد لوكس ع المفتاح

عبد السلام : تشطيب ايه و بتاع ايه ؟؟ انت بدأت تخرف يا يوشع

يوشع : تشطيب على ثروات العراق هههههههه

عبد السلام : اوعى تضحك مرة اخرى لحسن احلف ما اقرأ ليك خبر تاني

يوشع : و لا تاني و لا ثالث ... طول ما العرب بيفكروا بالطريقة ديه حتفضل اسراطين دولة (عربوعبروية)!!!سلام

الخرم الأول ما بين غباء الإنسان و حكم القدر

اول خرم في بنطلون حياتي هو غباء الإنسان

عندما كنت في الثانوية العامة كنت اعلم إني متميز و متفوق في مادتي الرياضيات و الفيزياء و هذا كان يعني ضرورة دخول كلية تتطابق مع هذه الميول و لكن كالعادة عقدة ( الدكتور ) التي تسيطر على الفكر العربي جعلتني اغامر و ادخل الطب و لسان حالي يقول ( توكلنا على الله ,,,, هكذا حكم القدر ) و بالطبع كلما اخذت ( خازوق ) في اي امتحان اقول ( حكم القدر ) .... و قدر الحياة

جلست افكر في اول خرم في بنطلوني فوجدت ان القدر كان جريانه علي باختياري و لم يكن اجباراً لي على شيء فأنا من اختار الطب رغم معرفتي بضعفي في الأحياء و الانجليزي و أنا ايضا من اصر على عقدة الدكتور رغم اني كنت من اشد المعارضين لها

لابد إن الواحد يضع الأمور على محملها الصحيح و لا يحمل القدر ما لا يحتمل و رغم أن حالتي تعتبر حالة عادية و قديمة و متكررة في اوساط الطلاب إلا اني وجدت أن الخرم الذي في بنطلوني هو نفس الخرم الذي في بنطلون الأمة العربية ...

خذ مثلا ما يسمى بالـــ ( نكبة ) و ما يسمى بالــ ( نكسة ) فالأمر يبدو في كلا المصطلحين اننا قمنا بالتخطيط السليم و الإعداد عالي المستوى و لكن الدهر أبى - كما كان يقول شاعر النيل - فكلمة نكسة تعني اننا لم نهزم لأننا كنا اضعف أو لأننا كنا مخطئين في قراراتنا بل لأن القدر و الحكم الإلاهي اراد ذالك .......

لابد من تخييط هذا الخرم الكبير الذي يشوه بنطلون العرب برقعة كروهات ممزوجة من ثلاث ألوان ( الصدق , الشجاعة , الاعتراف بالهزيمة ) فطالما أن الهزيمة تسمى نكسة و المؤامرة تسمى نكبة فإننا سنأخذ بدل النكسة ميت نكسة كما قال نجيب سرور

كان هذا وصف تفصيلي للخرم الأول و انتظروا قريبا بقية الاخرام التي في بنطلوني

مقدمة

مدونتي الجديدة ( بنطلون مخروم ) مدونة اسم على مسمى تعبر عن واقع حياتي التي كانت كالبنطلون تمشي في سلاسة و اناقة حتى اصابها الخرم الكبير الذي جعلها تتحول إلى اكبر ( بنطلون مخروم ) و لكن ححاول اضع لهذا البنطلون رقعة كروهات لأعرض صفحات حياتي عبر هذه المدونة التي ارجو ان تنال اعجابكم