بعد أن قام العرب ببيع جميع القضايا بسعر الجملة في سوق ( اللي ما يشتري نعمل له تخفيض علشان يشتري ) ..قام الجنرال ( أبو القذائف ) بإنشاء الدولة الإشتراكية الراسمالية الأفرواوروبيوافريقية الكبرى و اصدر قراره بإنشاء دولة ( إسراطين ) بدلاً من اسرائيل و فلسطين
و بعد مرور عشرين عاماً على هذا الحدث التاريخي جلس احد المواطنيين الاسراطينيين في احدى المقاهي الاسراطينية و هو يستمع إلى
الأخبار و يعلق عليها ( طبعاً باللغة العربوعبروية ) و قد قمت بترجمتها لكم بالعربية
عبد السلام : سمعت يا ( يوشع ) الخبر ده ؟؟
يوشع : خبر ايه يا ( عبدو ) ؟
عبد السلام : ( شاب اسراطيني يبحث عن عمل ) ؟؟
يوشع : ياما بكره نشوف بدال دخل فيها العرب ابقى قابلني لو فلحنا
عبد السلام : و مالهم العرب يعني ؟ انت كل حاجة تحشر فيها العرب علشان تشتم و خلاص
يوشع : لأ مش قصدي إن العرب هم سبب مشكلة الشاب ده .. أنا قصدي إن الشاب ده اكيد عربي ما دام بيبحث عن عمل
عبد السلام : إزاي يعني !!! ممكن تفهمني
يوشع : اصله دفع كل اللي في جيبه على اعلانات البحث عن عمل شكله فاكر إن الاعمال بالاعلانات
عبد السلام : و الله معاك حق على أيامي كانت الأعمال بالنيات
يوشع : نيات ايه يا حبيبي .. الأعمال دلوقتي بتتعمل بالاحجبة و ببودرة العفريت
عبد السلام : طب خد عندك الخبر ده ... ( اسراطينييون يتظاهرون من أجل تحرير العراق ) ؟؟
يوشع : هههههههههههههههههههههه
عبد السلام : ؟؟؟؟؟؟؟؟
يوشع : دول برضه من الجماعة العرب اللي قلتلك عليهم
عبد السلام : ؟؟؟؟؟؟؟؟
يوشع : اصلهم فاكرين الامريكان عبط و حيسيبوها ليهم
عبد السلام : بس الامريكان قالوا انهم جم علشان يحرروا العراق مش يحتلوه
يوشع : أه فعلاً حرروا العراق من ايدي العراقيين
عبد السلام : قصدك احتلوا العراق
يوشع : لا ابداً هما بس بيعملوا اعمال التشطيب هناك و حيسلموا البلد لوكس ع المفتاح
عبد السلام : تشطيب ايه و بتاع ايه ؟؟ انت بدأت تخرف يا يوشع
يوشع : تشطيب على ثروات العراق هههههههه
عبد السلام : اوعى تضحك مرة اخرى لحسن احلف ما اقرأ ليك خبر تاني
يوشع : و لا تاني و لا ثالث ... طول ما العرب بيفكروا بالطريقة ديه حتفضل اسراطين دولة (عربوعبروية)!!!سلام
3 comments:
أقسم بالله انك فاجأتني هده المرة بهدا المقال
انه تحفة صدقني
رؤية عربية من زاوية جديدة
طب خليني اسألك
هو انت صاحب فكرة تسمية دولة اسراطين؟
لو كنت انت يبقى سلام تقدير ليك
اما ان كنت ناقلها يبقى هدبحك
الحوار رائع
و اتمنى ان تكثر من مثل هده الحوارات الكوميدية المبكية
تحياتي سيدي
هده المرة اقدرك
كلمة ( إسراطين ) كانت من اقتراح الرئيس القذافي و أ،ا استخدمت الكناية ( ابو القذائف ) استعاره عن اسم السيد القائد
الحوار و الفكرة كلها من اختراعي أنا و لم انقل اي حرف من أحد
شكرا لمرورك الذي زاد مدونتي المتواضعة شرف
فعلا مقالة تحتوي على ابداع فكاهي سياسي جميل
Post a Comment